أخاف من الفشل
فيه ناس كثير يقيّدها الخوف، وما تتحرّك من مكانها مثل الفيل المُروّض
الفيل، لما يبدأون يروضونه في البداية يركبون له أغلال حقيقية وفي نفس الوقت يتم تخويفه وتعذيبه لحد ما يتبرمج إنه خلاص (هذا قَدَري)
بعد ما يتأكد المُدرّب إن الفيل تم برمجته وإخضاعه. كل اللي يسوّيه يربطه بحبل يقدر أي فيل صغير إنه يتخلّص منّه ،ولكن البرمجة والخوفهم القيد الحقيقي وليس الحبل.
فيه ناس تخاف تكسر الخوف!
تخاف تواجه ..
مثال : فيه ناس تخاف تتعلّم شي جديد وتكون سبّاقة. لازم مُبارَكَة الناس كلها وبعدين هُم يتعلّمون، يخافون يكونون السبّاقين.
وفيه ناس تخاف تخرج عن المألوف، لنفترض لو خيّرته بين عملين (وظيفة حكومية) وطبعاً راتب ثابت ،وبين وظيفة أونلاين ٣ أضعاف راتبه. الخائف بيختار المضمون، اللي هو الوظيفة الحكومية
الخائف خطواته ثقيلة ولو جيته بعد ٣ سنوات تلقى حاله ما تغيّر ،ما نفض الغبار اللي عليه وقال أنا بتغير
بالعكس هو يتغذّى على الأعذار وإن أي إقتراح تعطيه إياه هو ما يصير، وصعب، وغير ممكن.
ويبيّن لك إنه ما عنده دعم وما عنده فلوس وظروفه تختلف عن ظروفك ،وإنت غير وهو غير مستحيل يعترف بخوفه.
الخائف يفضّل يكون في الظل ،ما يحب يبرز،
الخائف ما يطوّر من نفسه ولا يوسّع مداركه
جداً عادي تلقى أشخاص متخرجين من ٥ سنوات من الجامعة وما أضافوا في سجلهم ولا شي خلال هال٥ سنوات
(وأنا كنت وحده منهم)
علشان تكسر قيد الخوف
تحتاج :
١- تعترف إنك خايف
٢- تتخيّل أسوأ سيناريو ممكن يحصل لو سويت الشي اللي تبا تسويه بس الخوف مانعك.
أكيد إستغربت : ليش أتخيل أسوأ سيناريو ممكن يحصل لو سويت اللي أباه ؟
إقرأ المثال وبتفهم : لنفترض إن (س) حابة تبدأ تتعلم التسويق الإلكتروني بس خايفه تبدأ ،لأن في إعتقادها إنها ممكن تفشل !
يعني تخيلوا السجن اللي حطّت نفسها فيه !
غالباً بتتعلم التسويق بشكل مجاني وبتبدأ أكاونت في تويتر وتقدر إنها ما تخبّر عائلتها لو هي ما حابة إنهم ينتقدونها أو لو هم غيرمشجعين ! ومع ذلك مع كل هذي الإمتيازات إلا إن خوفها من النقد والفشل منعها من إنها تبدأ.
،لو إنت مثل (س) وخايف تفشل،
أسهل شي تسويه : إنك تغمض عينك وتخيّل إنك بدأت وسويت كل اللي مطلوب منك ومرت ٦ أشهر ولا نتيجة تُذكَر ،وإستسلمت ..
حقيقةً شو اللي خسرته ؟؟
وقت ومجهود ؟!
في الحقيقة فيه ناس تضيّع حياتها في الإستهلاك وهي ما تدري
سنين من حياتنا ضيّعناها ونحن نشوف متاجر على الإنستقرام ومشاهير على مواقع التواصل الإجتماعي ،ونحن دايماً نكون جمهورمُستهلِك ونشوف الناس تنجح ولا فكرنا ننجح نحن بعد ..
يعني لو إستثمرت ٦ أشهر تتعلّم مهارة يديدة ما أتوقع بتفشل فشل كامل
️لازم بتطلع بفوائد
كل تجاربنا اللي خضناها سابقاً إستفدنا منها بطريقةٍ ما .. فقط لو نستذكرها ونقارن أنفسنا قبل وبعد
اللي يحاول بشكل حقيقي مش خِداعاً لنفسه لازم في يوم تصيب معاه (لازم) ..
جرّب ولما تجرّب أعطي التجربة حقها بالكامل !
-إبحث
-إجتهد
-إقرأ
-إسأل
-طوّر
-أبدِع
وإن فِشَلت خلاص عادي
إنت مأجور على السعي وليس على النتيجة.
نهايةً : أنا أقول إذا خاطرك في شي ،سوّه .. لأنك في اليوم اللي تبدأ ،بتسأل نفسك ( أنا ليش ما بديت قبل ؟!)
ونحن هنا لاجل نساعدك ونكون دليلك في مشوارك منصة باشنورز للعمل عن بعد توفر الكثير من الفرص.
وشكراً لك لوصولك هنا
بقلم مريم كاتبة محتوى